Кемедиё эжигей нимаз
Кемедиё эжигей нимаз
Ёвдо омбар хосдембу хуькуьмет Советире, тозе гIэдотгьоре ве эз гьемме у омбар шор бирембу эз коргьой колхозгьо. Чуьтам шор небу у, имисал э хуней энугьо дуь гIэребе гIорд гендуьми омори, дуь серегови шороб декирдет, э вэхд емишгьо фундугъ, бэгIли ве де емишгьой ге вегирдет. Эзуш бэгъэй эри гирошдигьо сал э угьо хэйли пул ве шоробиш расирембу.
Руз мэгIлуьмей "Нисону" бу. Ёвдо эз Шевеньё мугу:
―Шохьонгум э меревоз э клуб колхоз биё биёй.
―Чуьни беге э клуб колхоз шохьонгум? ―пуьрси Шевеньё эз бебешу.
―Митинги.
―Э хьисобевоз митинг варасде бэгъдо, концертиш мибу?!
―Эри, концертиш биренини.
―Ме э туьревоз ниём, туь мере концерте дире нисе гьишде.
Шевеньё данусдембу эри чуь коре бердеге бебешу юре э хуьшдеревоз. Увэхдигьо э клубгьой колхозгьо, шевгьой мигIидгьо, колхозчигьо э нимаз неравт гуфдире, мисохдуьт митинггьо, мибирмундуьт концертгьо. Гьевел гировунде оморембу митинг, э комики еки эз зеверте идоре оморе одоми мисохд доклад, песде гоф сохдембируьт активистгьо-агитаторгьой колхозгьо. Угьо, очмиш сохде мигуфдируьт эричуь товуне рабигьо гьишденуьтге гирде мигIидгьой дин-догIотире. Докладгьо ве гоф сохдеигьой активистгьо варасде бэгъдо, бирмундембируьт э хэлгъ концертгьо э гъувот художественни самодеятельности колхозгьоревоз, комигьоки суьфделе сер гирдебируьт эри гуьнжо оморе э колхозгьо. Э у концертгьо хундембируьт е ченд мэгIнигьо ве бирмундембируьт эз е перде биренигьо пьесагьо, э комигьоки бирмундембируьт дургунигьой диндогIоте, шефдигьой рабигьо ве куьгьне гIоширгьоре. Э концертгьо хэлгъэ лап хьэз оморембу, унегуьре клубгьой колхозгьо одоми пур бирембируьт, э клубгьо эри нуьшде, неки эри гIэилгьо, эри келегьош жиге вес нисе сохдембу. ГIэилгьо мипоисдуьт э пой э гIэрелугъ куьрсигьо, минуьшдуьт э сер пенжерегьо енебуге э хори чорзани зере лап э пушо э ён сегьне.
Э ён дер клуб нуьшдембу еки енебуге дуьдуь эз активистгьой колхоз, комигьоки нуьвуьсдембируьт фамилегьой э митинг оморегоргьоре. У колхозчигьо, комигьоки э митинг ниомо, пуьрсуьш энугьоре норембируьт э гуьрдлемей колхозчигьо, эжеки угьоре, номус доре, гIэйблуь сохдембируьт. Эге дуь-се бо неоморегоргьо мибисдоге, угьоре гьеркире дуь-се трудоден штрафиш сохдембируьт.
Шевгьой мигIидгьо э ижире митинггьо Ёвдо Шевеньёре миберд гьеммише э хуьшдеревоз. Оммо Шевеньё гьич бегьем те эхир у концертгьоре нисе дирембу. Ёвдо мидоно э зир пинжек Шевеньё сисид хуьшдере, чуьнки юре сисиде гирде гIэйб оморембу эз колхозчигьо. У мигуфди эз Шевеньё: "Митинг варасде бэгъдо, ме мивадарам э вогьней папрус кеширеревоз, песде туьш ведиро, э нимаз бурайм. Угьо миоморут э нимаз, эжеки гьемме мердгьо, сисидгьоре дегирде, нимаз ишуре михундуьт. Оммо Шевеньё мипоисд э ён дер нимаз. У, гьелбетте, нисе варасирембу, чуь хундембируьтге у мердгьо. Уре эз корсуьзи хов оморе, миводо хуьшдере э дер ененге минуьшд э ён дер нимаз, михиси...
―Имбуруз месуьз бура э митинг, ―мугу Шевеньё э бебешу.
―Эричуь? Туь эричуь нисе оморе?
Шевеньёре воисдембу гую э школеш гуьрдлемеи гуфдире, оммо э дургуни гуфдире у хуте не биребу.
―Туь мере концерте дире нисе гьишде. Дие ме чуь сохум оморе э туьревоз.
―Имишев екем концертеш миденишим, песде мирайм...
―Мере екем эйчуьни, гьуь...гьуь... Эзу хуби э хуне хисуьмгьо...
―Гьеле эз хори невероморейки э гоф бебе эри неденишире... Гуфдируьм миёй, дие зирти-пирти зере герек нисди...
Ёвдо нуьшдебу э гъирогъи жигей эн жергей куьрсигьо, комики бу э куьнди дер клуб. Шевеньё сисиде э гъултугъ деноре, поисдебу э ён бебешу. Митинг варасденге, сер гирде омо концерт. Бэхшвегиргьой художественни самодеятельность, се-чор мэгIни хунде бэгъдо, сер гирдуьт эри бирмунде чуькле пьеселегьо. Э суьфдеи пьеса бирмунде омо чуьтам е колхозчи, э дин-догIот бовор сохденигьо, руз орине шохьонгум эз кор оморенге, мивинуь сер гирди эри торик бире, у эри хуьшде мигую: "Эри руш чире вэхд дир бири, мигуиге шобот гъэриш бирере хунои, гьери бурам эз раби пуьрсуьм, гIэмел миёвге руш чире". У миёв э нимаз, мивинуь раби э хьэёт нимаз лампей дегьиреш норе э сер тапаретке, гобоеш нушунде, эдее э серчиревоз сер энуре чире. У мипуьрсуь эз раби:
―Эри руш чире вэхд дир небири раби? ГIэмел миёв руш чире?
―Раби, гьевел э гьово, песде э десю дебугьо серчиденишире, мугу:
―Эри, хелефме, гIэмел миёв, гьеле вэхд дир нисди, шобот гьеле дури.
Э дуьимуьн пьеса раби нуьшдебу э хьэёт нимаз, мэгIлуьмей мигIид "Кипур" бу. Е жогьиле зен овурд до э у керггьой "недовоире" эри куьшде. Оммо у зен зен небу, еки эз жогьиле гIэилгьой колхози бу. Увэхдигьо гьеле гIэруьс-духдер э художественни самодеятельность бэхш нисе вегирдембируьт, эз хэлгъ гIэйб оморембу ишуре ве екиге угьо терсирембируьт эз бебе-дедешу ве гуфди-мугуй зенгьо. Жогьиле зен керггьоре доренге э раби, у ведешендени эз гъултугъ серчире ве сер гирдени эри куьшде керггьоре. Э керггьоре куьшдеки эз зир лов хуьшде, хэндуьсде, гуфдирени:
―Зи хьэлепоти, зи кополоити,
"Хуькуьмет эн Совети",
Керглегьоре микуьшуьм,
Э нимазлейме минуьшуьм.
Раби бугъоз керггьоре бурра, шендени э хьэёт нимаз. Зен рафдени керггьоре эри вэгирде. У гъуз бире сэгIэт, эз сер эну офдорени сефгию. Гьеебо еки эз зал нуьшдегоргьо, хьэрой дешенде, гуфдирени:
―Эле, эле Мемри зен бири. Эри эни "зен" е жогьиле "кук ―одохлу" офде гереки...
Гье э и теретэгIди, Ёвдо, эз душ Шевеньё десе евошлей зере вадарафдени, егIни уш ведиров гуфдире э юревоз. Оммо Шевеньё эз гуж хэнде э гъэвл нисе офдоре бебешу юре огол зереире. Унгъэде уре хьэз оморембу эз пьесагьо, бирмунде оморебируьтгьо э сегьне, у эз хьэвес энугьо бебешу э клуб недериире, э жигей бебешу екиге нуьшдеиреш сечмиш несохд.
Э сеимуьн пьеса бирмундени дуь жовоне мердгьоре. Угьо биренуьт гьем пиёнискегьо ве гьемиге гъуморбазгьо. Угьо пулгьошуре э гъумор норе, нуьшденуьт э куьнж куче эри фикир сохде, чуь гIэмел офутге, чуь чоре сохутге эри пул офдешу эй ичку хурде ве гъумор возирешу. Гье ебо еки эз угьо гуфдирени:
―Офдем!
―Чуь офдей? Пул офдей? Эзже офдей?
―ГIэмел офдем. Данусдени чуь сохим?
―Чуь сохим?
―Туь э зени геймиш бош, э шуьгъэмтуь дени лемболуше, бурайм э духдир. Ме мигуюм, ки туь зен мени, гIэил мундей гуфдире, мивегирим справке. Справкере миберим э собес, мивегирим эри туь пособие.
Увэхдигьо гIэил мунде зенгьоре собес пособие дорембу.
Угьо миёвт экин духдир. Э зени геймиш биребугьо мерд шем гирдебу, егIни духдир, сифет юре дире, мерд биреи юре недануь гуфдире. У мердиге сер гирдени эри мэгIни хунде:
―Ой духдир, жон духдир,
И гIэруьс гIэилле мунди...
Духдир вэхишдени э пой, оморени экин э зени геймиш биребугьо мерд, э шуьгъэм ю дес зенуь гуфдире, лемболуш эз шуьгъэм эну офдоре, расирени э хори. Э зал офдорени келе хэнде. Ингъэде Шевеньё хэндуьсдени, эз гуж хэндей эну, сисид эз гъултугъ эну офдорени э сер пойгьой ю. Энжэгъ ивэхд оморени э ёр эну бебешу э куче э ю дениширени гуфдире. У зури-зури, сисиде вегирде, денорени э гъултугъ, ведироморени э куче. Э куьнж куче расиренге, Ёвдо э гъэгьри-гIосииревоз, гуфдирени эзу:
―Текей денишуьм э туь, гъурумсогъ?! Имогьой вэхд нимаз ведиромореш эдее биреки. Гьи? Чуь? "Сэхь эз сопу келеи?!" ―У миёв э хуьршевоз э сер Шевеньё.
―Бебейме муно, эз ёрме фурмуш бири. Небуге ме теимэхьэли ниведироморум беге? Гьуь...Гьуь... ―гирисдени бирере хуно, сохдени хуьшдере Шевеньё.
―И чуьни, туь гьеле незереки эдее гирисдеки. "Те хонохо дуьзде гирде, ―гуфдире э метелегьо, ―дуьзд вэхишдебу хонохоре гирде". Хуби дие зирти-пирти мезе. Э нимаз эри рафде дие вэхд немунди. Хубтеики бурайм э хуне хурек мигIидимуре хурим.