Беньямин Сафанов - Богъдоргьо

Беньямин Сафанов. Богъдоргьо

Ихдилотгьо эз зиндегуни колхозчигьой Дербенд

Пушойгофи

Те довгIогьо ме не Шевеньё э е класс хундебирим. ДовгIо сер гирденге, иму школере шенде рафдим эри кор сохде. Ме э завод консервгьо сохденигьо кор сохдембируьм, оммо Шевеньё екем вэхд э колхоз, песде э совхоз кор сохдембу. ДовгIо варасденге гьердуьйму сер гирдим эри хунде э шевине школа, оммо дие, неки э е класс, э е школеш нисе хундебирим. Гьеркиму э е школе хундебирим. Эхирки э гьечиревоз ме не у эз еки евош—евош дур бисдорим. ГIэре—бир эеки вохурденге, хьол—руз екире пуьрсире—жусдембирим, оммо гьевелинегьоре хуно куьнд небирим эеки.

И пушогьо, е руз эдембируьм э куче гешде, э ме омо вохурд Шевеньё.

— Руз туь эхэйр бу! — мугу у эз ме. — Туь эхи э кучегьош веди нисе бире, кеш екем гешдим гьери, хэйли мэхьэл туьре недирем...

Ме "руз эхэйрбуй" энуре вогорунде бэгъдо, дуь хьол—руз екире пуьрсире бэгъдо, гешде—гешде рафдим вадарафдим э богъчей шегьер. Е хэвлете скамейка гешде офде, нуьшдим.

— Пой ебо, — мугу Шевеньё, хэндее тегьер, — ме шиновусдем туь "писатель" бирей, ихдилотгьо нуьвуьсде гуфдире. Неки писатель, "шогьириш" гьисди, стихигьош нуьвуьсдени гуфдире...

— Туь э ме руьхшенд сохде, "гIэззи холу"?

— НэгI жун туь, ме эдем эз расдеки пуьрсире, эге туь нуьвуьсде данусдениге, мере э туьревоз е гъуллугъи.

— Пой ебо, дие туь чуьжире тати, туь альманах татиреш нисе хунде, эхьисобевоз, михундиге, пуьрсиреш нипуьрсири ме чуь нуьвуьсденуьмге, непуьрсирекиш миданусди.

— Дие у гофгьоре бигьил—о, гу бура нуьвуьсдениге?

— Эри, нуьсденуьм, чуь бу песде?

— Данусдени чуьни?

— Гу, гьери винуьм чуьниге дие?

— Мере воисдени эри туь екем ихдилотгьо сохум эз зиндегуни колхозчигьо, туь у ихдилотгьоре екем гъуьч сохде, э книг нуьвуьсдиге, е хубе ихдилотгьо мибу, хундегоргьоре эз угьо хьэз миёв...

— Пой ебо, туь мунош Шевеньё, туь колхозчи кей бирей? Екемлей кор сохди э колхоз довгIо сер гирдебугьо сал, песде э совхоз рафди эри кор сохде...

— Эле, гьечуниге туь эз зиндегуниме гьичиш нисе данусде. Ме колхозчи омбар бирем, ченд ве ченд салгьо бирем. Данусдени эз коми салевоз ме колхозчи биремге?

— НэгI! Эз коми салевоз бирей? — пуьрсируьм ме, хэндуьсде—хэндуьсде.

— Туь мэхэнд—гьо, ме зарифетсуьз эдее гуфдиренуьм. Ме колхозчи бирем эз у салевоз, кейки жовоне гIэилгьоре э солдати рафдебируьтгьоре, рэхь сохдебируьт э духовой оркестревоз...

— Эжун туь, Шевеньё, — мугум, диеш хэнде гирде мере, — те довгIо сер гирде, жовоне гIэилгьоре э солдати гьемишеш э музикгьоревоз рэхь сохдембируьт, неки духовой оркестр, гъовол—зурновчигьош ченд десдегьо бирембируьт. Келе межлуьсгьо сохдембируьт бебегьо—дедегьо эз шори гIэилгьошу э солдати рафдеи. Энжэгъ э салгьой довгIо, хэлгь э довгIо рафдеки, гIэрс э чум вери рэхь сохдембируьт одомигьоре э довгIо. ДовгIо варасде бэгъдо, е—дуь салигеш дуьл хэлгь екем гурунд бирембу, жовоне гIэилгьо э солдати э рафдеки, оммо эз песигьо ве гьеймогьоиш жовоне гIэилгьо э солдати э рафдеки келе межлуьсгьо сохденут. Имогьой э гуфдирей туьревоз, эзже мибу данусде коми салиге у туь гуфдиренигьо сал, гIэилгьоре э духовой оркестровоз рэхь сохдигьо сал, егIни эз коми салевоз туь колхозчи бирейге?..

— Пой, тэгIди месох. Те довгIо сер гирде эри колхоз иму духовой оркестр овурдебу, э ёр туь гьисдиге. У оркестр у сал суьфделе сер гирдебу эри музик зере, гьейсэгIэтире хуно, лап хуб э ёрме мунди гьемме. Белки э ёрме мундеш нимунд. Э ёрме эйчуь мунди данусдени? КукгIэмлеймеш э колхоз кор сохдембу э бебеймуревоз. У шохьонгумгьо э духовой оркестр эри музик зереире хуте бире рафдембу. У сал уш э солдати рафдебу, эзу товуне э ёрме гьемме лап хуб мунди. Эз колхоз иму э солдати рафдебугьо гIэилгьоре, колхоз, э е десде поюнде бэхшгьош доребу ве песде э духовой оркестревозиш рэхь сохдебу. Эз расдекиш э ёртуь немунди? Туьш унжо бирики, э вокзал оморебирики гIэилгьоре эри рэхь сохде.

— У кор э ёрме гьисдигьо, уре туь дуз гуфдире, оммо туь мунош, Шевеньё, у коми сал буге э ёрме нисди. Песде, пой ебо, туь у салгьо э школа хундембирики...

— Эри, гьелбет хундембируьм, ме не туь э е класс дебирим дие.

— Дие туь эз у салевоз колхозчи чуьтам бире?

— Э школе хуну гуфдире, беге колхозчи нисе бире?

— Э колхоз кор несохденге, колхозчи чуьтам бире?

— КукгIэмлейме э солдати рафденге, бебейму берд мере э духовой оркестр но, музик зере хуте бошум гуфдире. Ме эз школа оморенге, гьемме руз, шохьонгумгьо рафдембируьм э духовой оркестр колхоз. Туь увэхдигьоэ Хуней пионери э художественни кружок рафдембири...

— Имогьой э гуфдирей туьревоз туь э духовой оркестр музик зере хуте бирей гуфдире, беге туь колхозчи хьисоб бире?

— Духовой оркестр эн колхоз биренге, ме колхозчи хьисоб небире, дие ки хьисоб биренуьм? Гьеле те умэхьэлиш, туьре данусде воисдениге, ме эзуш пушо колхозчи бирем, чуьнки бебейму бири екм эз биненорегоргьой колхоз. У мере гьеммише э гуьрдлемегьо ве мигIидгьой колхози э хуьшдеревоз миберд...

— Гьечу гу дие. Гьечу биренге, э гуфдирей туьревоз, туь эз гIэилиревоз колхозчи бирей. Оммо уреш гуюм эритуь, ки туь колхозчи небирей, энжэгъ кук колхозчи бирей.

— Бугу дие, колхозчи бисдо, кук колхозчи бисдо чуь бэшгъэи? Эзуш бэгъэй, довгIо сер гирденге, ме школере гьишде, э колхоз рафдем эри кор сохдэ. Бил зерем, гъупи зерем, капарус шендем, чуьш сохдем э колхоз.

— Ме эдее диренуьм, э и гофгьоревоз туьре гуфдире воисдени, эз колхоз иму бине норе оморе вэхдевоз, туь колхозчи бирей гуфдире?..

— Гьелбет бирем. Гьеммей эну салгьо э колхоз кор несохдемгеш, ме зиндегуни колхозчигьоре лап хуб данусденуьм. Ме эз зиндегуни энугьо гирошде рузгьоре эритуь ихдилот сохдумге, туь угьоре екемлей гъуьч сохдиге, лап хубе ихдилотгьо мибу, гьеле туь эзме согъбошиш мигуи.

Эхирки, гIэзизе хундегоргьо, сер ишмуре дорд недуьм, Шевеньё, коргьой гуфдиренигьоре хуно, "Эз гъугъ догъ овурде мере, э кун догъ нушунд", ме рази бисдорум эри гуш дошде ихдилотгьой энуре ве, угьоре шиновусденге, эриме норумки эришмуш ихдилот сохум гуфдире, гьич е гофеш дегш несохде, гье гьечу чуьтам Шевеньё эриме ихдилот сохдиге.